கடக்கவியலாத தெரு

தெரு ஒன்றைக் கடப்பதென்பது

உண்மையில் வாழ்வு ஒன்றைக் கடப்பதாகும் போலும்.

விம்மல் கலந்து உதிரும் கண்ணீர்த் துளியொன்றை

விளக்கேற்றி வைக்கும் புன்னகையொன்றை

மெதுமெதுவாய் மடல்விரியும் மலரொன்றை

புறவாசலில் பூத்து மறையும் மின்னலொன்றை

தெருவைக் கடக்கும்போது உணராவிட்டால்

இன்னும் நீங்கள் முழுமையாய் தெருவைக் கடக்கவில்லை.

வாழ்வையும்தான்.

இடமிருந்து வலமாக

குறுக்கிருந்து நெடுக்காக

வடகிழக்கிலிருந்து தென்மேற்காக

மேலிருந்து கீழாக

கடக்க வேண்டிய தெருவும் வாழ்வும்

மிச்சமிருக்கின்றன காலமெங்கும்.

கடக்கவியலாமல் பாதியிலேயே

திரும்ப வைத்த தெரு ஒன்றால்

விட்டத்தில் தொங்குகிறது உயிர் ஒன்று.