ப்ரியமான உப்பு

எதிர்பார்ப்பு

-விலக்கான நாட்களின் ஈர நசநசப்புக்கு

ஒப்பாய் எரிச்சலூற்றி இருக்கும்

கனவு

-மழலை ஈன்றவளின் பாலூட்டும் ஏக்கம்

அலுவலகக் கழிப்பறையில் பீய்ச்சப்படுதலாய்

துயருறுத்தி இருக்கும்

வார்த்தைகள்

-பிரசவிக்க இயலாது வயிற்றுப் பிள்ளையோடு

மரித்துப்போன தாயின் இயலாமையை

விதைத்திருக்கும்

முன்முடிவுகள்

-திரும்பிப் படுத்துறங்கும் உன்னை

வன்மையாய்த் திருப்பி உன்னனுமதியின்றி

புணரும் வேதனையைத் தந்திருக்கும்

ஆக்கிரமிப்பு

-பிரசவித்த வயிற்றின் கோடுகளென

வலியின் ரேகைகளை உள்ளுக்குள்

ஓடவிட்டிருக்கும்

எல்லாம் விலக்கி

ஓர் உதட்டுச் செடி முத்தப் பூவை புஷ்பிக்கிறது

ஓர் உதட்டுச் செடி கொய்கிறது

உப்பின் சுவை கூடுகிறது