ரத்தமாற்று சிகிச்சையில் உதவுவதற்கெனவே
விலாவில் முளைத்த றெக்கையோடு
திடுமென நிகழ்ந்தான் சாத்தான்
பை நிறைய உதவிகளோடும்
கையே வாஞ்சையாகவும்
அங்கலாய்த்துக் கொண்டிருக்கும் அவன்
அனைவருக்கும் தேவையாயிருந்தான்
ஆறுதலைக் கேடயமாக நீட்டும்
அவன் கிருபைக் குறித்து
யாருக்கும் எவ்வித ஐயப்பாடுமில்லை
துயருறுவோரின் காயங்கள் மீது பூச
துளிர்த்துக்கொண்டே இருக்கின்றன
அவனது மொனைக் கண்களில் கண்ணீர்
சம்பாசித்துக்கொண்டிருக்கையிலேயே
சாலையைக் கடக்க சிரமமுற்ற மூதாட்டிக்கு
மாறிப்போனான் கைத்தாங்கலாய்
அவ்வப்போது உலக நலனில்
தோய்ந்தெழுந்த அவனது சிந்தனை
இன்னும் பிற இத்யாதிகள் பொருட்டு
கவலையாய் மாறிற்று
அன்று அவதிக்குள்ளானவர்களை கவனமாக
தம் பிரார்த்தனைப் புத்தகத்தில் பதிந்து
உருக்கமாக ஜெபிக்கவும் துவங்குகிறான்
யாவற்றையும் அவதானித்தபடி...
பாலூட்டிக்கொண்டிருப்பவளின் முலைகளில்
முறுவலோடு லயித்திருந்த கடவுள்
தம் மாட்சிமைமிகு ஒளிபொருந்திய கிரீடத்தை
மார்வாடிக் கடையில் வைத்துவிட்டு
அறுவைசிகிச்சைக்கு விரையும்
ஆம்புலன்சின் பின்புறம் தொற்றியபடி
தாசி வீட்டுக்கு அருகாமையில் சொல்லி
சச்சரவு செய்துகொண்டிருந்தார் கடவுள்
சுகன் (ஆகஸ்ட் 2010)
3 comments:
அருமை கதிர் !
நன்றி நண்பா...
சாத்தானை என்னவெல்லாம் செய்வதாய் உத்தேசம் கதிர்.
சாத்தான் வண்ண வண்ணமாய் குறியீடாகிறான்.
கடவுள் என்ற ஏகாதிபத்தியத்தை, (ஆதிக்கத்தை) முதன் முதலில் கேள்வி கேட்டு அசைத்துப் பார்த்தவன் என்ற வகையில் எனக்கு அவன் மீது மரியாதை.
சாத்தான் என்றொருவன் இருந்து உங்கள் ப்ளாகை பார்த்தால் "அற்புதம்" என்று பின்னூட்டம் போடுவான்
Post a Comment