வலிக்கிறது தோழர்களே

வாகன விபத்துக்குப் பிறந்து, வளர்ந்து வரும் இந்த வலிக்கு 
இன்று முதல்பிறந்தநாள் நண்பர்களே.
வாருங்கள்
சிறிது சதைகளை வெட்டி 
கொஞ்சம் ரத்தம் சிந்தி
சின்னஞ்சிறு சிராய்ப்புகளைப் பரிசளித்துக் கொண்டாடுவோம்.
யாராவது மூர்ச்சையுற்று விழுவதாய் இருந்தால்
விழா இன்னும் சிறக்க வாய்ப்புண்டு.
புகைப்படம் எடுப்பவர்கள் விபத்தின் கசகசப்பை
உயிர்ப்பித்துத் தந்தால் பேருபாயமாக இருக்கும்.
விபத்து விசாரிக்க மருத்துவமனை வந்து
தலையிலடித்து அழுதுவிட்டு தலப்பாகட்டி பிரியாணி
எங்கு கிடைக்குமெனக் கேட்ட உறவுகளும் வரலாம்.
விழாவில் கண்ணீர் வரவழைக்கும் பானம்
கண்டிப்பாகப் பரிமாறப்படும்.
தவிரவும்
இந்த வலிக்கு ஒரு பெயரையும் சூட்டிவிடலாம்
என்றிருக்கிறேன்.
வலி என்று இருப்பதாலே வளர வளர
அளவுக்கதிகமாக வலிக்கிறது தோழர்களே.